വെള്ളപ്പൊക്ക സാധ്യതയുള്ളപ്പോൾ പറമ്പിക്കുളം – ആളിയാർ കരാർ നിർത്തി വെക്കണം – സനീഷ് കുമാർ ജോസഫ് എം എൽ എ

ചാലക്കുടി : ചാലക്കുടി പുഴത്തടത്തിൽ വെള്ളപ്പൊക്ക സാധ്യതയുളള സമയങ്ങളിൽ പറമ്പിക്കുളം ആളിയാർ കരാർ നിർത്തി വെക്കണമെന്ന് ചാലക്കുടി എം എൽ എ സനീഷ് കുമാർ ജോസഫ് ആവശ്യപ്പെട്ടു.

ജലജാഗ്രതാ സമിതിയും ചാലക്കുടി റിവർ പ്രൊട്ടക്ഷൻ ഫോറവും സംയുക്തമായി നടത്തിയ ജലജാഗ്രതാ സത്യാഗ്രഹം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

ജൂലായ് 29ന് പുഴയിൽ വലിയ തോതിൽ വെള്ളം കയറുന്നതു വരെ തനിക്ക് അറിയിപ്പൊന്നും ലഭിച്ചില്ലെന്ന് അദ്ദേഹം പറഞ്ഞു. പുഴയ്ക്കു കുറുകെയുള്ള ഓരോ അണക്കെട്ടിലും മഴക്കാലത്ത് ആവശ്യമായ ഇടം ഉണ്ടാകണമെന്നും, അതിനനുസരിച്ച് റൂൾ കർവുകൾ പുതുക്കണമെന്നും സനീഷ് കുമാർ ജോസഫ് ആവശ്യപ്പെട്ടു. പെരിങ്ങൽക്കുത്തിലും പീച്ചിയിലും അണക്കെട്ടുകൾ കൈകാര്യം ചെയ്യുന്നതിലെ വീഴ്ചയാണ് ചാലക്കുടി പുഴത്തടത്തിലും കരുവന്നൂർ പുഴത്തടത്തിലും വെള്ളപ്പൊക്കം സൃഷ്ടിച്ചത്.

ചാലക്കുടി പുഴത്തടത്തിലെ മുഴുവൻ അണക്കെട്ടുകളും അതിവേഗം നിറഞ്ഞു കൊണ്ടിരിക്കുന്ന പശ്ചാത്തലത്തിൽ അടിയന്തരമായി അണക്കെട്ടുകളിൽ പ്രളയ നിയന്ത്രണത്തിന് ആവശ്യമായ നടപടികൾ കൈകൊള്ളണമെന്ന് ആവശ്യപ്പെട്ടു കൊണ്ടാണ് ജലജാഗ്രതാ സത്യഗ്രഹം നടത്തിയത്.

മഴക്കാലത്ത് പെരിങ്ങൽക്കുത്തിലെ ജലനിരപ്പ് 415 മീറ്ററിൽ നിർത്തുക, പറമ്പിക്കുളത്തെ പരമാവധി ജലനിരപ്പ് 1820 അടിയായി നിശ്ചയിക്കുക, കാലവർഷക്കാലത്ത് കേരള ഷോളയാറിലെ ജലസംഭരണം 75%ൽ പരിമിതപ്പെടുത്തുക, മഴയേയും ജലസ്ഥിതിയേയും സംബന്ധിച്ച വിവരങ്ങൾ തത്സമയം തദ്ദേശ സ്വയംഭരണ സ്ഥാപനങ്ങൾക്ക് ലഭ്യമാക്കുക തുടങ്ങിയ ആവശ്യങ്ങൾ അവർ മുന്നോട്ടു വെച്ചു.

ജലജാഗ്രതാ സത്യാഗ്രഹത്തിന് ഐക്യദാർഢ്യം പകർന്ന് ജയൻ ജോസഫ് പട്ടത്ത് “പ്രളയരക്ഷ” എന്ന പേരിൽ നിശ്ചലദൃശ്യവും നടത്തി.

ചടങ്ങിൽ പ്രൊഫ കുസുമം ജോസഫ് അദ്ധ്യക്ഷത വഹിച്ചു.

ചാലക്കുടി പുഴയും പ്രളയവുമായി ബന്ധപ്പെട്ട കാര്യവുമായി ബന്ധപ്പെട്ട് റിവർ പ്രൊട്ടക്ഷൻ ഫോറം കൺവീനർ എസ് പി രവി വിഷയാവതരണം നടത്തി.

ചാലക്കുടി നഗരസഭ ചെയർമാൻ എബി ജോർജ്ജ്, വി ഓ പൈലപ്പൻ, ലീന ഡേവീസ്,
സിന്ധു ജോജു, ഫാ വിൽസൻ എലുവത്തിങ്കൽ കൂനൻ, ഫാ വർഗ്ഗീസ് പാത്താടൻ, ഹരി മൂക്കന്നൂർ, ഡെന്നീസ് കെ ആൻ്റണി, ഫാ ജോയ്സ് ചെറുവത്തൂർ, കെ ബി മുരളീധരൻ,
പ്രജിത്ത്, യൂജിൻ മൊറേലി, വിത്സൻ മേച്ചേരി,
തോമസ് പുതുശ്ശേരി, അഡ്വ കെ ആർ സുമേഷ്,
ജിജൻ മത്തായി, ജോർജ്ജ് തോമസ് ഉള്ളാട്ടിക്കുളം, കുഴൂർ പഞ്ചായത്ത് പ്രസിഡൻ്റ്
സാജൻ കൊടിയൻ, ജയൻ ജോസഫ് പട്ടത്ത്,
കലാഭവൻ ജയൻ, കെ എം ഹരിനാരായണൻ,
ഫാ ജോൺ കവലക്കാട്ട്, ഷിബു വാലപ്പൻ, പി കെ കിട്ടൻ, പ്രൊഫ വത്സൻ വാതുശ്ശേരി, ദീപു ദിനേശ്, യു എസ് അജയകുമാർ, ഐ ഐ അബ്ദുൾ മജീദ് എന്നിവർ സംസാരിച്ചു.